Државната комисија за спречување на корупцијата (ДКСК) констатира состојба на судир на интереси кај лицата Кире Ристевски и Гоце Вучковски поради извршување две функции истовремено и поради повреда на член 9 од Законот за спречување судир на интереси.
Гоце Вучковски, истовремено со функцијата член на Совет на Општина Ранковце на која е избран на локалните избори одржани 2013 година се уште ја извршува односно не се откажал од извршување на функцијата управител на Трговското друштво за производство, трговија и услуги „ДИЈО ГРАДБА“ ДООЕЛ увоз-извоз, село Гиновци, Ранковце што е спротивно на наведениот член од законот.
Кире Ристевски, соопшти денеска ДКСК, кумулација на функции, истовремено со функцијата член на Советот на Општина Демир Хисар ја извршува и функцијата директор на Средното општинско училиште „Крсте Петков Мисирков“ Демир Хисар.
Постапувајќи согласно со одредбите од Законот за спречување судир на интереси, а во насока на отстранување на констатираните состојби на судир на интереси, ДКСК се обратила до наведените лица со барање во рок од 15 дена сметано од денот на приемот на барањето доброволно да се откажат од извршувањето на едната од двете функции кои истовремено ги извршуваат, односно да се откажат од извршување на функцијата управител на трговско друштво или установа.
Гоце Вучковски и Кире Ристевски, соопшти ДКСК, не постапиле по барањето поради што е донесена одлука да им се изрече мерка јавна опомена.
Согласно со член 25 став 2 од Законот за спречување судир на интереси мерката јавна опомена се објавува во средствата за јавно информирање.