Министерот за одбрана Талат Џафери денеска оствари телефонски разговор со помошникот на секретарот за одбрана на САД за меѓународни безбедносни работи, Дерек Колет.
Џафери, како што информира Министерството за одбрана, се заблагодарил за континуираната поддршка која Република Македонија ја има од САД и информирал за актуелните реформски процеси во државата и регионот.
Разменети се мислења за активностите и напорите кои Министерството за одбрана ги презема во врска со евроатлантската интеграција на земјата, како и за плановите на Министерството во врска со придонесот во мисиите предводени од НАТО, ЕУ и ОН.
Помошникот на секретарот за одбрана Колет ја повторил заложбата на САД за стратешко партнерство со Република Македонија и посочил дека САД ќе продолжат да ја поддржуваат Македонија.
Тој истакнал дека САД се надеваат на што е можно поскоро решавање на проблемот со името, со што ќе бидат отстранети сите пречки за побрзо зачленување на државата во НАТО структурите.