Талат Џафери избира различни дисциплини за да урива рекорди. По маратонското дебатирање, денеска внесе и новина „Говор со молчење“.
Најави дека сите рекорди ќе бидат во негови раце.
Молчеше еден час, а потоа повторно го започна говорот, со цитирање на Уставот, Охридскиот договор, споредбени закони од Босна и Херцеговина и Хрватска, и се за да докаже дека Законот за бранители е штетен и во спротивност со Уставот.
И сега фати нова тактика, 15 минути говори, 15 минути молчи. Во 15-минутниот молк, вели, си ги средува мислите.
Не дозволува ни во говорот ни во молчењето некој да го прекинува. На барањето на Веле Ѓеорѓиевски од ВМРО-ДПМНЕ за процедурална забелешка, Џафери остро се спротивстваува, дека во тек на говор нема процедурални интервенции.
И додека Џафери молчи, се читаат книги и весници, а во шега пратениците се договараат дека можат и да почнат да плетат или да извезат по некој гоблен.
ДУИ најави дека ќе ги искористи сите институционални можности за да го спречи носењето на Законот за бранители.
На колаициската ВМРО-ДПМНЕ и нудат или да го повлече законот, или истите права што се предвидени за бранителите да важат и за припадниците на ОНА.
Претседателот на Комисијата Цветанка Иванова, вчера рече дека комисијата ќе работи поинтензивно, и по 18 часот и во саботите. По Талат Џафери треба да говори Ермира Мехмети.