На кејот на Вардар, во близина на Камени мост, денеска ќе се одржи протест против изградбата на панорамското тркало од група граѓани кои се организираат преку социјалните мрежи. Настанот е најавен како „Скопје не е Дизниленд“ и е реакција на барокот и антиквизацијата на градот кој го преуреди централното подрачје. Панорамското тркало, велат организаторите, е круна на непотребното и несоодветно трошење на јавните пари.
Протестот ќе започне во 18 часот, а ќе се одржи и граѓанско собрание на која ќе се разменат мислења за потребата од панорамско тркало. Во знак на пародизирање на зафатите во центарот на Скопје, демонстрантите ќе се облечат во костуми и маски од карактерите на Дизниленд.
– Сакаме да им порачаме на одговорните дека СКОПЈЕ НЕ Е ДИЗНИЛЕНД и ова лудило МОРА да сопре. Продолжуваат да се градат контроверзни зданија и споменици без соодветна јавна дебата и консултација со жителите на овој град.Ние не сакаме нашите поколенија да отплаќаат долгови со непоимливи камати за оваа естетска и политичка катастрофа. Кога во градот имаме над 30 проценти невработеност, незадоволителна инфрастуктура и илјадници луѓе на минимална плата од 8.000 денари кои немаат доволно ни да си ги прехранат фамилиите, на Скопје не му требаат нови долгови и идеолошки Дизниленд.
На Скопје му треба модерна инфрастуктура и прогресивни идеи за развој на економијата и соживот. Придружете ни се на граѓанското собрание за да започнеме разговор за излез од овој као-антички, квази-барок, скопско-дизни кошмар? За да покажеме што чувствуваме за се што е изградено од шмизлите па навака ќе носиме маски и костуми. Индијанци, каубојци, кловнови, дизни карактери и карикатури, придружете ни се!, се наведува во поканата на објавена на Фејсбук.
