Во нашата изборна програма имаме предвидено многу инфраструктурни проекти, а едни од нашите врвни приоритети од оваа област се и изградба на нови булевари, изјави денеска Менде Диневски, кандидат за градоначалник на „Сојузот за иднината“ во општина Битола.
„Покрај булеварот „Васко Карангелевски – Партизанска“ кој веќе го промовиравме пред граѓаните на Битола, денеска ќе Ви презентираме, уште едно сообраќајно решение од интерес за битолчани, кое ќе го подобри сообраќајот, но и изгледот на нашиот град. Тоа е булеварот „Дулие – Грозд“ во должина од 3 500 метри, кој ќе се протега долж улиците Иван Милутиновиќ – Едвард Кардељ – 4-ти Ноември – до ул „Борис Кидрич“ во центарот на градот.
– Булеварите ќе имаат четири коловозни ленти, по две во еден правец, со зеленило во средината. Од двете страни ќе бидат реконструирани и тротоарите, но исто така ќе бидат изведени и хортикултурни решенија на дрвореди, а ќе биде поставена и современа урбана опрема заедно со најсовремената хоризонтална и вертикална сигнализација. Со овој проект, Битола ќе добие лик на современ европски град, сообраќајно организиран, како што впрочем Битола и битолчани заслужуваат“, рече Менде Диневски.