„Најголемиот дел од прилепските основни и средни училишта не го решиле проблемот со обезбедување огрев за претстојната грејна сезона.
Локалната самоуправа и градоначалникот Марјан Ристески на автопревозниците кои вршат превоз на ученици не им префрлиле ниту денар од ноември 2011 година. Според наши сознанија, заклучно со 1-ви септемви долгот изнесува околу 500.000 евра, па не е чудно ако наскоро превозниците откажат да ги превезуваат учениците и наставниците“. Ова го кажа Јане Џингоски од СДСМ Прилеп.
Тој праша каде завршуваат овие пари, кои на општинска сметка ги префрла министерството за образование.
„Во исто време училиштата должат поголеми суми за неплатена струја, телефон и комунални услуги, податок кој директорите и локалната власт го кријат како змијата нозете.
Посебна приказна претставува проблемот со малиот број на запишани средношколци и големиот број на наставнички кадар.
Имено, надвор од законот и од секоја логика, не ретко, партиските директори на ДПМНЕ за едно работно место вработуваат по двајца партиски војници и послушници, а од друга страна се бараат согласности за да се формираат паралелки со недоволен број на ученици“, рече Џингоски.