Министерот за надворешни работи, Никола Димитров, денеска оствари средба со делегација од Министерството за правда и безбедност на Кралството Холандија, предводена од Арјен Таселар, раководител за меѓународна соработка и проекти, и Ханс Јонкир, одговорен за координирање на политиките за меѓународна соработка.
Димитров информираше за реформиските активности на Владата, со фокус на областите на правосудството, реформата на јавната администрација, борбата против корупцијата и организираниот криминал, како и за реформите во работата на безбедносните служби.
„Ние сме посветени приврзаници на холандското мото – стриктно и фер, а во процесот на пристапување кон ЕУ гледаме клучна реформска алатка за квалитативна трансформација на нашето општество, но и платформа базирана на резултати за фер реформски натпревар на земјите во процесот“, истакна Димитров.
Министерот го потенцираше значењето и изрази благодарност за досегашната холандската билатерална поддршка во насока на унапредување на клучните реформски области и градењето демократско општество.
Претставниците на холандското Министерство за правда ја потенцираа потребата од продлабочена имплементација и континуирана испорака на резултати од реформската агенда, со крајна цел – отпочнување на пристапните преговори на Македонија со Европската Унија.