Девет повредени лица и материјална штета од околу 110 илјади денари се последиците од двете сообраќајни несреќи што во петокот и саботата се случиле на две различни места во тетовско, информираше портпаролот на СВР Тетово Марјан Јосифовски.
Првата сообраќајка се случила во петок околу 22 часот на автопатот Тетово-Гостивар во близина на Брвеница. Во неа учествувале автомобил Смарт со швајцарски регистерски таблички управуван од В.А.(27) од тетовското село Глоѓи и Опел Корса со тетовски регистерски таблички управувана од Б.Х.(32) од Тетово. Во несреќата со телесни повреди се здобиле вкупно шест лица, по тројца сопатници од секое од возилата. Сите биле пренесени во тетовската Клиничка болница од каде по укажаната лекарска помош биле пуштени на домашно лекување. При полицискиот увид била утврдена материјалната штета што се проценува на околу 60 илјади денари додека првично причина за сообраќајката било непочитување првенство.
Втората несреќа се случила синоќа околу 21 часот на регионалниот пат Тетово-Попова Шапка. Откако возачот П.А. (20) од Тетово загубил контрола над автомобилот Шевролет Авио со тетовски регистарски таблички по што излетал од коловозот. При тоа возачот и двајцата сопатници на 16 и 18 години се здобиле со телесни повреди, но и тие по укажаната помош во тетовската болница биле пуштени дома.
– Материјалната штета изнесува околу 50 илјади денари, а првично причина за несреќата е пребрзо возење, рече Јосифовски.