Наградите за најдобар филм, режисер, сценарио и филм во категоријата Синебалкан ќе бидат доделени вечерва на затворањето на 11. издание на фестивалот на европски филм „Синедејс“.
Во официјалната конкуренција се десет наслови од млади европски автори, седум во програмата Синебалкан и пет во селекцијата МК&ЕУ (европски филмови во кои учествуваат режисери, сценаристи, актери, продуценти од Македонија).
По прогласувањето на најдобрите во нивна чест ќе биде прикажан филмот „Кога ќе се раздени“, најновото дело на српскиот режисер Горан Паскаљевиќ. Музиката во филмот е на Влатко Стефановски, а во него играат мето Јовановски и Зафир Хаџиманов.
На годинашното издание на Синедејс во неколку селекции беа прикажани 107 филмови. Фестивалот беше отворен на 16 овој месец со проекција на словенечкиот филм „Шангајски циган“ во кој главната улога ја игра македонскиот актер Висар Вишка, а се појавува и актерот Сенко Велинов. Филмот, снимен по сценарио и режија на Марко Набершник, годинава ја доби наградата за најдобро сценарио на Филмскиот фестивал во Монтреал.
