В.Д. претседателот на ССМ бил физички нападнат и по физичкиот напад и прегледите во Градска болница е задржан на трауматологија, објави Дојче Веле.
„Група рекетари предводена од разрешениот претседател на ССМ, Живко Митревски, утрово околу 4 и 30 часот насилно влезе во зградата на ССМ, притоа буткајќи ја и полицијата“, велат претставници на четирите синдикати кои ноќеска останаа во студениот хол на синдикалната зграда, со цел да спречат разрешениот претседател на Сојузот на синдикатите на Македонија (ССМ), Живко Митревски, да ги исели од таму.
„В.Д. претседателот на ССМ, Дарко Димовски беше физички нападнат и по физичкиот напад и прегледите во Градска болница е задржан на трауматологија“, велат тие.
Ваквиот развој на настаните уследи откако вчера Министерството за труд и социјална политика (МТСП), соопшти дека го поништило решението со кое претседателот Живко Митревски е разрешен од функцијата, со што тој останува легитимен претседател на ССМ.
Според очевидци, пред ССМ во моментов има обезбедување кое не пушта да се влезе во зградата.
Од четирите синдикати најавуваат дека за скандалозниот настан наскоро ќе се огласат со соопштение.