Независниот кандидат за градоначалник на општина Куманово од опцијата „Кога ако не сега“ Виктор Цветковски и кандидатите за советници на средбата со жителите од населбата „Бавчи“ ветија решавање на инфраструктурни проблеми.
– Еден од проектите значајни за оваа населба и соседните „Средорек“ и „Стари Лозја“ е возообнувување на Ромскиот културен центар кој ќе има за цел промоција на културните и традиционалите вредности на сограѓаните од ромската етничка заедница, рече Цветковски.
Тој вети изградба на локални патишта и изградба на пешачки мостови во месноста „Багрем Бања“, како и регулација на речното корито на Кумановка.
– По примерот на функционирањето на двојазични групи во градинките во Куманово на македонски-албански и македонски-српски јазик предвидено е и отварање на мешовита група во градинките и на македонски-ромски јазик, додаде Цветковски.
Тој промовираше и дел од програмата која се однесува на заштита на лицата со интелектуална попреченост, најавувајќи целосна финансиска поддршка на Дневниот центар за лица со интелектуална попреченост и формирање на мали групни домови, како и ослободување од општински давачки на семејствата на лицата со попреченост.