Пожарот во атарот на село Требовље е се уште активен на месноста викана Лутоец и покрај патот што води од селото Самоков, месноста викана Дреноец, кој се протега низ борова шума од двете страни на патот. Жариштето е присутно на месноста викана Јасикоец, кое се наоѓа во непосредна близина на патот и населеното место Растеш.
Како што соопшти Центарот за управување со кризи (ЦУК), во моментов за пожарот во атарот на селото Требовље ангажирани се Подрачните одделенија на Дирекцијата за заштита и спасување (ДЗС) од Македонски Брод, Прилеп и Кичево. Се очекуваат да пристигнат уште лица од ДЗС, месно население, територијални противпожарни единици од Македонкси Брод, Скопје, Куманово и Кавадарци, еден авион на ДЗС, војници од гарнизонот Кичево, од ЈП „Македонски шуми“-подружници Македонски Брод и Кавадарци и од општина Македонски Брод.
– Поради големината на просторот, лошиот терен, видот на горивата, материја (борова шума), високите темпетатури и присуство на ветар, се појавуваат потешкотии при гасењето на пожарите во овој регион, информира ЦУК.
Загрозената викендица и пчелните семејства во вчерашниот ден се спасени од пожарот во село Слатина, но тој се шири кон местото викано Видуш и во моментов не може да предизвика поголема материјална штета. За пожарот во село Слатина ангажирани се вработени на ЈП „Македонски шуми“.
Центарот за управување со кризи информира дека е во постојана координација со надлежните институции и оти ја следат состојбата. На пладне ќе се одржи состанок на Оперативно-координативно тело за заштита на шумите од пожари.