Претседателот на Социјалдемократскиот сојуз на Македонија Бранко Црвенковски денеска оствари средба со шефот на мисијата на ОБСЕ во Скопје, амбасадорот Ралф Бред.
На средбата соговорниците разговараа за измените во Изборниот законик, при што амбасадорот Бред беше информиран за ставот на СДСМ по ова прашање, односно дека владиниот предлог воопшто не ги имплементира препораките на ОБСЕ/ОДИХР за кои се залага и СДСМ, а кои се однесуваат на спроведување на фер и демократски избори, стои во соопштението од партијата.
„Во однос на меѓуетничките односи, кои ОБСЕ одблиску ги следи, претседателот Црвенковски напомена дека тие се влошуваат, за што придонесува и политиката која оваа Влада ја спроведува. Во таа насока, земјата се соочува и со постојано влошување на состојбата во медиумите, загрозување на слободата на изразување и политички притисоци во судството заради што и довербата во институциите постојано се намалува. Претседателот Црвенковски го повтори ставот на СДСМ во однос на евро-атлантските интеграции и напомена дека тие се од највисок приоритет за земјата, за чие реализирање партијата останува целосно посветена“, се вели во официјалното соопштение по средбата.