„Зоран Ставрески подобро се чувствува како кум на Никола Груевски отколку како министер за финансии и затоа изјавата ја даде како кумашин на Груевски“, вака лидерот на СДСМ Бранко Црвенковски ја коментираше изјавата на Ставрески дека лидерот на СДСМ и на ВМРО-НП се лице и опачина на сите падови на духот и моралот на македонските граѓани.
Ставрески, рече Црвенковски, требаше да одговори зашто имаме пад на екомонијата за 1,4 насто, зашто вработеноста во индустријата е намалена за 8 проценти, колку владата му должи на стопанството и зошто долгот кон странство е зголемен двојно.
„Ставрески нека го праша кумот Груевски зашто 4 години седеше во неговата влада како млада невеста и зошто потпишуваше се што ќе му кажеа и за приватизациите и за стеачите и за отпуштените работници“, рече Црвенковски.
Затоа мојата порака, рече Црвенковски до кумот Груевски и кумашинот Ставрески е „со вас куме на власт, на граѓаните им изгоре ќесето“.
„Не ни помислував дека ќе седнам на заедничка маса со Георгиевски, со него и денес имаме разлики но не се надевав дека државата ќе дојде на ова дереџе. Настрана ги ставаме сите идеолошки разлики и суети и заедно со сите и партиски, непартиски луѓе и интелектуалци, ќе ја избориме слободата со сите на кои иднината на Македонија им лежи на душа. Ние друга држава немаме“, рече Црвенковски.