Со закани, уцени и со трошење на народните пари за реклами, власта се обидува да го добие вашиот глас – истакна лидерот на СДСМ Бранко Црвенковски, вечерва при посетата на велешкото село Иванковски. Тој ги храбреше жителите да не потклекнуваат пред многубројните притисоци и им порача да ја имаат на ум помислата дека власта е во нивни раце.
Токму во ова село, кандидатот за градоначалник на Велес, Аце Коцевски го победи со 120 гласови својот противкандидат, па Црвенковски ги повика да ја повторат победата и во вториот круг.
-Тоа можете да го покажете веќе на седми април и тоа само со една минута зад параванот. Кога ќе донесувате одлука помислете дека пред да го заокружите ливчето, власта е во ваши раце. Таа една минута. Потоа кога ќе го заокружите и фрлите ливчето во кутијата, веќе сте ја предале власта некому за наредните четири години. И потоа жалење, кукање, каење нема – посочи Црвенковски.