Градоначалникот на Куманово, Зоран Дамјановски денеска оствари протоколарна средба со амбасадорот на Црна Гора, Душан Мрдовиќ. Дамјановски ја искористи можноста и во знак на благодарност на амбасадорот му подари статуа од Батко Ѓорѓија, како симбол за Куманово.
– Мрдовиќ е човек кој изминатите неколку години со својата добра волја покажа дека Црна Гора е пријател на Македонија, но пред се на Куманово. Сакам да искажам дека денес имавме плодни разговори во насока на соработка помеѓу двете држави. Отворивме повеќе теми , меѓу кои и за збратимување и соработка помеѓу Куманово и Никшиќ. Зборувавме и за економската соработка, бидејќи доколку едни со други не ги следиме трендовите и не си помагаме, нема да имаме позитивен развој – изјави Дамјановски.
Тој додаде дека се надева овие средби на ниво на градови и региони, пред се помеѓу двете држави, да дадат плод во идната интеграција.
– Многу ми е мило што ја дефиниравме поранешената соработка и контактот кој што постоеше во поранашна Југославија. Целото време додека ја извршував дипломатската мисија во вашата држава живеев за да ги обновиме врските и пријателството. Мислам дека е можна соработка помеѓу некои општини од Црна Гора, на локално-економско ниво – истакна амбасадорот Мрдовиќ.
Тој најави дека градоначалникот на Никшиќ, по повод Денот на ослободување на Куманово, 11-ти ноември ветил дека ќе присуствува на прославата и дека тогаш ќе се потпише меморандумот за соработка.
Елена Георгиевска