[staff name=”Мики Трајковски” position=”Автор”][/staff]
Дирекорот на Центарот за јавно здравје од Охрид, Атанаско Михаилов рече дека центарот нема да врши испитување на квалитетот на водата од градскиот водовод од каде охриѓани пијат вода, доколку јавното претпријатие „Проаква“ не го подмири долгот кон центарот за испитувањето на квалитетот на водата.
Директорот Михаилов тврди дека Проаква за период од една година им должела околу 3 милиони денари.
„Ако не ни го платат долгот ние ќе се најдиме во ситуација да не можеме да купиме реагенси со кои што ќе ја испитуваме водата. Во случај ако настане некоја хаварија одговорноста треба да ја сноси директорот на јавното претпријатие. Тогаш под знак прашање доаѓа испитувањето на квалитетот на водата. Таа сума на пари за Центарот за јавно здравје е многу висока. Ние не располагаме со средства со кои можеме да набавуваме хемикалии и реагенси кои ни се неопходни за да ја испитуваме водата. До сега повеќе предупредувања и пуштивме на „Проаква“, повеќепати се договаравме со директорот“, рече за А1 директорот Михаилов.
Михаилов вели дека еднаш неделно од 24 позиции во градот земале мостри од вода од градскиот водовод. Михаилов кој е претседател на Општинскиот комитет на ВМРО- ДПМНЕ во Охрид вели дека во целата оваа работа нема никаква политика и се надева дека до проблеми нема да дојде. Тие не биле буџетска институција и опстојувале од сопствени средства. Директорот на „Проаква“ Златко Старкоски, рече дека до прекин на испитувањето на квалитетот на водата нема да дојде.
„Ние имаме големи побарувања и поголеми отколку што ние должиме кон Центарот за јавно здравје, од болницата Св. Еразмо и Општата болница Охрид. Така да мислам и истото беше понудено на г-динот Михаилов да направиме цесија или компензација и во целост да го затвориме долгот“, рече за телевизија ТВМ директорот Старкоски.