Јавното претпријатие „Паркинзи“ на Општина Центар, од 1 октомври најавува поволности за плаќање на паркинзите што се во негова надлежност, со припејд-карта, наречена „Ем карта“.
Kартата ќе чини 350 денари, а секој корисник, со неа ќе има гратис од 100 денари.
Корисниците на оваа припејд-карта наместо да плаќаат 50 денари за час паркирање во првата зона, ќе плаќаат по 40 и наместо да плаќаат 40 денари во втората зона, ќе плаќаат по 30 денари.
Исто така, корисниците ќе можат да резервираат место за паркирање, со тоа што ќе се јават во контакт-центарот на претпријатието, на телефонскиот број 072 251-251.
Претпријатието ќе им ја достави припејд-картата на станарите на домашна адреса. За нив таа ќе биде бесплатна, со тоа што исто така ќе имаат 100 денари бонус паркирање.
Картата според најавите ќе може да се купи на паркоматите на територијата на Општината Центар, каде што исто така ќе може да се дополнува и проверува состојбата.