Барањето на независните гевгелиски советници,Томче Ќичуков и Ристо Ѓоргиев за преиспитување на цената за пречистување на отпадните води доби зелено светло и од останатите советници на општина Гевгелија кои едногласно одлучија да се задолжи Управниот одбор на јавното претпријатие „Комуналец“ да ја преиспита одлуката за утврдување на цената за пречитување на водата.
Предлагачите образложија дека пред поднесување на барањето ги побарале и добиле параметрите кои од страна на јавното комунално претпијатие биле доставени до Регулаторната комисија која определила од февруари годинава цената да изнесува 13 денари од кубик вода за домаќинствата и 27 денари од кубик за правните лица.
– Пресметките што ние ги направивме врз основа на доставените показатели во кои влегуваат податоци за количината на пречистена вода во пречистителната станица, за месечно потрошената струја за нејзино работење, за потребните вработувања, потрошените реагенси како и за амортизација покажуваат дека цената за пречистување на кубик вода треба да изнесува пет, а не 13 денари за домаќинствата, велат доставувачите на барањето.
Советот на општина Гевгелија ги прифати нивните аргументи и му наложи на УО на „Комуналец“, да ја преиспита одлуката за утврдување на цената за пречистување на отпадните води.