Невообичаено многу топла вода има во бунарот кај семејството Давиткови од кумановското село Черкезе.
Двајцата сопружници Стојан и Драгица забележале дека од бунарот почнала да излегува пареа. Потоа увиделе дека водата е многу топла и веднаш ги информирале надлежните од Центарот за јавно здравје. Оттаму, наведуваат дека земени се мостри и добиените резултати укажуваат дека бактериолошки водата е исправна.
– Хемиската анализа покажува зголемено присуство на нитрати и ќе ги почекаме анализите за присуство на тешки метали. Топлата вода најверојатно е од земјиштето, од некоја пукнатина и тоа само хидрогеолозите можат да го кажат. Мора да се направат темелни анализи, истакна доктор Мимоза Величковски од Центарот за јавно здравје Куманово.
Последните испитувања покажале дека водата од бунарот е 86 степени. Инаку, претходно, посочија сопружниците водата била студена и семејството и соседите со децении ја користеле за пиење и за други потреби.