По најавата за зголемување на минималната плата која од 1 јули ќе изнесува 13.000 денари, од Влада велат дека немаат толеранција за работодавачите кои не го почитуваат договорот за минимална плата. Ги охрабрија работниците да ги пријавуваат работодавачите кои само фиктивно ќе ја покачат минималната плата и ќе ги принудуваат работниците дел од префрлената плата на картичките, да ја вратат.
„Апелираме до сите работници кои се принудени да враќаат дел од платата да го пријават тоа. Ќе следуваат санкции за сите работодавци кои ја имаат оваа практика. Ова мора да се искорени и ние цврсто стоиме зад оваа определба“, рече портпаролот Бошњаковски.
Тој денес соопшти дека Владата е во преговори со работодавачите со цел од 1 јули минималната плата да стане 13.000 денари.
„Цврсто сме уверени дека овие преговори ќе завршат успешно и дека од први јули минималната плата во Република Северна Македонија ќе изнесува 13.000 денари. Ова значи нов стимул и за сите останати плати на сите места во цела држава со цел да се постигне еден прогрес и таа спирала да оди постојано нанапред“, рече Бошњаковски.