Во разговорот кој беше презентиран во судницата, се слуша како Бојан Јовановски договара операција за Катица Јанева. Тој на почетокот од снимката вели дека Јанева требала да се оперира кај Жан Митрев, а потоа и се јавува на експсецијалната обвинителка и и кажува дека ќе се префрли цела операциона сала во болницата „8 Септември“ за да се изврши зафатот. Но, Јанева и вели дека е изморена од тоа и дека друг пат ќе прават муабет.
„Катица требаше да се оперира кај Жан Митрев“, вели Јовановски, а Камчева сугерира дека може кај нив во болница, но Јовановски не се согласува поради тоа што медиумите ќе дознаеле и ќе се создадела фама.
„Нема смисла да го изгориме тој доктор. Го сакам како персона“, вели Ана Камчева.
Јовановски се јавува кај Јанева и ја вклучува на спикерфон, објаснувајќи за што зборуваат со Камчев, Камчева и Милески.
„Они би организирале се за во „8 Септември“, се да се заврши, цела операциона сала ќе ја префрлат таму“, и кажува Јовановски на Јанева, а таа пак, вели „Веќе сум изморена од тоа. Не треба ништо. Нејќам такви работи. Не познавам никој од нив. Друг пат ќе правиме муабет за тоа“.
„Ќе ја убедиш бе во Италија или Бугарија, ќе отиде“, му вели Милески на Јовановски, а добива поддршка од Ана Камчева која сугерира Јанева да не се оперира во „Жан Митрев“.
„Многу повеќе сум зборувал за тебе, него ти што мислиш“, му вели Јовановски на Камчев.
Дуковски како бранител на Јовановски приговараше на автентичноста на снимките, бидејќи не се знаело од кога е снимката и немала врска со обвинението.