Тука сме не да се претставиме кои сме, туку да го обзнаниме почетокот на крајот на тиранската власт наречена злосторничко здружение. Неодамна лидерот на тоа злосторничко здружение за мене и за лидерот на овој блок, Павле Трајанов, изјави дека сме марчни слики. Јас му одговарам да, ние ќе ви бидеме вашиот мрак, рече Слободан Богоевски, екс разузнавач и носител на кандидатската листа на Коалицијата за промени и правда во четвртата изборната единица.
– На 11 декември ќе го победиме овој режим затоа што сите граѓани сакаат да биде победен, не само ние. Но нема да го победиме само злосторничкото здружение предводено од така наречената фамилија, ќе ги победиме вредностите на кои се изгради и почива ова злосторничко здружение, рече Богоевски.
Тој нагласи дека власта ќе биде казнета за се што направи, за одземената слобода, за корупцијата, рекетот, за невините жртви во монтирани политички и криминални процеси, како и за капиталот кој е изнесен од Македонија.
– Ќе ги казниме затоа што ги земаа надежта и перспективата на младите. Мора да падне режимот, тоа го знаат и самите тие. Мора јасно да му кажеме на нашиот народ напатен што ние сакаме, ние сакаме слободна Македонија, држава на слободни граѓани, владеење на правото и правдата како врвен принцип, еднаквост за сите, рече Богоевски.