„Љубомир Магаш, човек од криминалното подземје кој лично учествувал во шверцот со нафта даде изјава во која ги посочи Бранко Црвенковски и Љубомир Фрчковски за луѓе со кои го правеле, одобрувале и спроведувале шверцот со нафта, во девдедесеттите“, рече на прес конференција, Александар Бичиклиски, портпарол на ВМРО-ДПМНЕ.
Според Бичиклиски, ова е запрепастувачко прво јавно признание на човек кој бил вклучен во тој шверц, а со кое се посочува државното раководство на чело со Црвенковски, за организатор на овој криминал.
„Љубомир Магаш изјави, цитирам : Во Македонија во тоа време беа Бранко Црвенковски и Љубомир Фрчковски и без нивна соработка не беше возможно да го изведеме шверцот.
Нема бегање од ова. Ова не смее да помине незабележано. Во ова признание по име и презиме се посочени Бранко Црвенковски, премиер на Македонија, и Љубомир Фрчковски, министер во неговата влада дека правеле шверц. Дека правеле криминал, дека ја краделе државата. Ова е скандал од големи размери.
Тарифата на Бранко, според признанието на Магаш била 25 фенинга од прошверцувано литро нафта.
Колку ли само литри нафта биле прошверцувани и колку ли само пари биле испрани?
Бранко Црвенковски треба да одговори: за колкав шверц станува збор, колку цистерни пуштаа низ границите и кој се се богатеше, додека народот го осиромашуваа и го ограбуваа?
Бранко треба да каже во кои џебови отидоа парите од шверцот на нафта? Со име и со презиме, без политиканство и обиди за забошотување на темата.
На кои банкарски сметки завршуваа овие црни пари? За колкава сума станува збор?
Освен Црвенковски и Фрчковски, кој се бил вклучен во ваквиот шверц? Дали од тука се финансираше СДСМ, дали од овие пари настанаа десетиците олигарси на СДСМ“, рече Бичиклиски.