Во Македонија се активни четири пожари, во атарот на село Вражале, општина Зелениково, во село Добровени, општина Новаци, во село Црешнево, општина Македонски Брод и во село Вратница, општина Јегуновце.
Според Центарот за управување со кризи, пожарите кај селото Јаболце, општина Сопиште, во Гошинце и во Националниот парк „Маврово“ на Бистра, се ставени под контрола.
Гаснењето на пожарот во Вражале е отежнато поради конфигурацијата на теренот. На терен се 30 вработени на Шумското стопанство „Караџица“ и месното население. Во текот на денот дејствувал и авион на Дирекцијата за заштита и спасување. Се очекува пожарот да биде локализиран.
Пожарот во Добровени зафатил високостеблеста листопадна шума, а за негово гаснење се ангажирани екипи на Шумското стопанство „Кајмакчалан“ и Теренската противпожарна единица, Битола. Дел од пожарот преминал на страната на Грција.
Поради непристапен карпест терен отежнато е и гаснењето на пожарот кај Црешнево кој засега е активен во атарот на село Белица, на местото „Северот“. Гори сува трева и ниска вегетација. Нема опасност од негово префрлање на места со погуста вегетација.
Пожарот над село Вратница во Јегуновце зафати букова и мал дел чамова шума, а гаснењето е отежнато поради тешко пристапниот терен каде од утринските часови се наоѓаат екипа од Шумското стопанство „Лешница“ – Тетово и месното население. Дејствувал и авион на Дирекцијата за заштита и спасување.