Деветтото издание на Меѓународниот уличен фестивал „Баскер фест“ со околу 100 артисти и жонглери од дваесетина светски земји, вечер ја почнува турнејата низ Македонија со настап во Гевгелија во рамки на програмата за прослава на Спасовден, заштитникот на градот.
Организаторите на фестивалот ветија дека годинава на граѓаните ќе им се понуди релаксирачки одмор и забава со квалитетна и разновидна музика. Музичката програма е подготвена од голем број бендови зачинета со ноти на реге, рап, рок и етномузика.
Фестивалот ќе се одржува во цела Македонија. Продолжува утревечер со уште еден концерт за завршницата од прославата на Спасовден во Гевгелија, а потоа се сели во останатите градови за да стигне до завршницата во Дојран на почетокот од јули.