Автоматски систем за наводнување ќе добие паркот „Нирнберг“ во Ново Лисиче и во двата парка меѓу зградите зад ТЦ „Скопјанка“ во населбата Острово. Системот ќе почне да се поставува идната недела, и ќе биде во функција за претстојното лето.
Општина Аеродром информира дека во паркот кај игралиштето „Нирнберг“ покрај булеварот „Видое Смилевски – Бато“ во Ново Лисиче, системот за наводнување на 15.000 квадратни метри ќе содржи над 200 прскалки, кои ќе се вклучуваат автоматски во одредени временски интервали и на тој начин зелените тревни површини константно ќе ги одржуваат свежи. Системот за наводнување ќе се напојува со бунарска вода и на тој начин ќе се заштеди водата за пиење.
Ваков автоматски систем за наводнување ќе биде изграден и во двата парка меѓу зградите зад ТЦ „Скопјанка“, кој ќе покрива вкупно 13.000 квадратни метри зелена површина со 230 прскалки.
Ваков систем е поставен веќе во Паркот со авион, Паркот на езерата, Паркот на светлината, паркот „Бановина“, Паркот „13 Ноември“, Паркот „Јане Сандански“ и Паркот „Тоше Проески“.
Во соработка со ЈП „Паркови и зеленило“ во паркот „Нирнберг“ се садат и 80 дрвца од видовите гинко, платан, јасен, софора, сорбус и липа, со што ќе се збогати и флората во овој дел на Општина Аеродром.