Првиот впечаток за изгледот на градот туристите, откако ќе стигнат во Охрид, го добиваат од автобуската станица. Најголемото туристичко место во Република Македонија и не може да се пофали со некаква модерна автобуска станица. Асфалтираниот простор на кои со вертикална сигнализација се обележани таканаречените перони и малата барака во која собира едвај тројца патници како билетарница, претставуваат автобуска станица во Охрид.
Од ветувањата на градоначалникот на Охрид, Никола Бакрачески во изборната кампања во која влезе во трката за прв човек на градот засега нема ништо. И автобуската станица, како и други капитални инвестиции, останаа само на хартијата во предизборниот пропаганден материјал.
Јас како иден градоначалник и мојата советничка листа и тимот кој што ќе го формираме, впрочем тоа е и во нашата програма, една од првите наши задачи ќе биде на ова место да издигнеме еден препознатлив објект кој ќе биде лице на градот, тоа ќе биде современа меѓуградска автобуска станица, која ќе биде изградена по сите меѓународни стандарди со потребните инфраструктурни објекти, со сите техничко-технолошки помагала. Нашата намера е ова место да стане и центар за околните населби кои гравитираат овде и свратилиште на голем број граѓани, ќе има голем број на придружни објекти така да ова место навистина ќе прерасне во втор центар на градот– рече Бакрачески од местото каде што сега се наоѓа привремената автобуска станица во текот на изборната кампања.
Но, откако помина половина од градоначалничкиот мандат, просторот кај автобуската станица е ист. Се уште во истата барака патниците купуваат билети и се уште автобуската станица во Охрид претставува неуредена јавна површина со калливи премини и дупки како на крај од светот.
Бакрачески во изборната кампања пред охриѓани потенцираше дека ја превзема одговорноста за, како што тогаш велеше, неотпочнатите и незавршени работи. Жителите на Охрид, но и сите оние туристи кои пристигнуваат во Охрид, се уште чекаат на ветувањата на Бакрачески и ВМРО – ДПМНЕ. Со ваков изглед на објектите од јавен карактер, Охрид не може да се бори во трката за привлекување на туристи и развој на туризмот, а уште помалку да се брои како светска туристичка атракција.
Ф.Ј.