На Универзитетот ФОН во Струга денеска се одржа презентација на проектот „Посвојте парк“ на која присуствуваше и амбасадорот на САД во Република Македонија Пол Волерс.
Американскиот амбасадор Волерс им додели сертификати и благодарници на директорите на средните училишта кои беа партнери во таканаречената „Зелената Академија“ што опфати обуки за заштита на животната средина и студиски патувања низ Македонија.
Тој истакна дека е особено важно што младите луѓе во Струга и во целата држава се вложуваат себеси во зачувувањето на животната средина.
– И самите знаете дека животната средина е најважното нешто. Заедно треба да вложувате за почист воздух, за почисти и поздрави води, безбедна и здрава храна. Во тоа треба да помогне како централната, така и локалната власт, со бројни стратегии. За да ги зачувате националните богатства, треба долгорочно да вложувате и да работите. Гледам дека сите вие млади луѓе, се грижите за вашите животи, за вашето здравје. Тоа може да се види и од наједноставните нешта кои ги правите секој ден, од најбаналното третирање на отпадот. И светот ќе биде подобро место за живеење, ако сите кои размислуваат што е добро, тоа и го прават. Добро е кога сето тоа во практика ќе се примени, и ќе се преземат конкретни акции, рече американскиот амбасадор Волерс.
Целта на овој проект е да се зголеми свесноста меѓу младите за предизвиците во сферата на заштита на животната средина во Македонија.
Според проект-менаџерката Катерина Василевска, со преземените активности се очекува да се зголеми и личната одговорност кај поединецот, како да ја разубави урбаната средина со конкретни еколошки акции.
– Целта на проектот е да се развие свеста кај младите за еколошките проблеми со кои се соочува Македонија и да се инспирираат сами да преземаат активности за да ја подобрат лошата состојба во која се наоѓа Македонија во насока на еколошка свест. Следната активност ќе биде градење и создавање на паркови. Ќе се одберат пет запуштени зони во центарот на Струга и пет тима од исто толку училишта ќе ги трансформираат во паркови, рече Василевска.
Во рамките на проектот @Посвојте парк“ што го спроведува Локалната агенција за развој од Струга ќе се организира и промотивен настан „Зелен Саем“, како и избор на најдобро уреден парк.