Алфа телевизија е купена од српската фирма ЦХС Инвест Груп за 2, 5 милиони евра. Ова го пишува Балкан инсајт и наведува дека се проверени и документите од македонскиот Централен регистар, кои покажуваат дека ТВ станицата има нов сопственик.
Парите биле уплатени на Фершпеда за 56 насто од акциите во телевизијата.
Веста за продажбата не е споделена со вработените на телевизијата ниту пак е информирана јавноста досега.
“Компанијата одлучи да не се откриваат детали за продажбата на Алфа ТВ сеуште”, изјави за Балкан инсајт, Мелпомени Корнети, менаџер на Алфа Скоп, во чија сопственост е Алфа ТВ.
Српската фирма со адреса наведена како Савски Насип во Белград, е во целосна сопственост на КомТрејд Холдинг, оф-шор компанија со седиште во Холандски Антили.
Шеф на ЦХС Инвест груп е новинарката од Белград, Симонида Казиќ. Таа беше дел од тимот на Пинк ТВ, сопственост на српскиот бизнисмен Жељко Митровиќ кој се очекуваше да се купи Алфа ТВ пред две години.
Вработените во Алфа ТВ неофицијално изјавиле дека новите сопственици ќе ја преземат телевизијата кон крајот на месецов.
Неодамна, друга српска компанија, Интернет груп, исто така поврзано со ComTrade, купи половина од медиумската компанија, МПМ, од германскиот ВАЦ.