Двете основни училишта во општина Неготино интензивно се подготвуваат за почеток на новата учебна 2020/2021 година, и тоа со онлајн настава, но и настава со физичко присуство, информираше градоначалникот Тони Делков.
– Имено, покрај бројните мерки согласно протоколите за работа на основните училишта, во двете училишта се извршија бројни активности во насока на подобрување на целиот воспитно-образовен процес на учениците, соопшти Делков.
Појасни дека во централното училиште „Гоце Делчев“ е извршена замена на осветлувањето со нови ЛЕД-светилки, како и полирање и лакирање на подната површина во училишната спортска сала, а реконструирани се и тоалетите.
Во ПУ „Гоце Делчев “ – Тремник извршена е комплетна реконструкција на училишниот двор.
– Набавени се нови 70 клупи за централното училиште, а целосно е варосано подрачното училиште во село Тимјаник. За подобро реализирање на наставата, обезбедени се 15 десктоп и 22 лаптоп-компјутери, а подобрена е интернет-конекцијата со супербрз оптички интернет, нагласи Делков.
Информираше и дека во ПУ „ Страшо Пинџур“ во Пепелиште е инсталирано комплетно ново парно, а во завршна фаза е изградбата на дел од оградата во училишниот двор.
Обезбедени се нови 15 десктоп-компјутери, инсталирана е нова оптичка интернет-конекција, а набавена е и нова спортска опрема (нови кошеви) за реализирње на наставата по физичко воспитување.
– Извршена е дезинфекција на училишните клупи и столчиња, подови, прозорци, врати и ходници, со што училиштата ќе може да функционираат во согласност со протоколите усвоени од Комисијата за заразни болести и усогласени со Министерството за образование и наука, додаде градоначалникот на Неготино.