Пожарот во атарот на кумановските села Пресница и Глажња се уште е активен, но надмината е опасноста во Пресница каде што вчера пожарот се приближи до куќите. Со пожарот е зафатена шума, даб, габер и бука, информира Центарот за управување со кризи (ЦУК).
Се уште гори и кај тетовските села Копанце и Туденце. Во текот на вчерашниот ден пожарот се прошири во правец на селата Сиричино, Еребино и Ротинце во општина Јегуновце, како и кон скопското село Радуша. Зафатена е сува трева и нискостеблеста шума во должина од седум километри, а за гаснење интервенираат пет лица од шумското стопанство „Лешница“.
Во вечерните часови пожарот се прошири и во правец на село Церово, општина Желино и се прибилижи на еден километар од куќите во селото. Во гаснењето на пожарот беше вклучена и ТППЕ Тетово со едно противпожарно возило, како и дел од месното население. Утрово пожарот во правец на села Копанце е со намален интензитет, а се уште е активен кон селата Церово и Бојане. Побарано е гаснење од воздух.
Под контрола е ставен пожарот во општина Чучер Сандево, кај место викано Биљаково во атарот на село Танушевци, а локализирани се пожарите во атарот на селото Радуша општина Сарај и кај селото Кучково во општина Ѓорче Петров. На терен се присутни екипи поради контрола и превенција од повторно реактивирање.