Екипи од јавното претпријатие „Чистота и зеленило“ почнаа акција на уредување на најстариот градски парк, лоциран зад автобуската станица во Куманово.
Акцијата, според најавите на надлежните, се очекува да заврши до крајот на неделава.
– На расчистувањето се работи машински и рачно. Се сечат исушените гранки, уредуваат зелените површини, а шутот се изнесува машински. Апелирам до граѓаните совесно да се однесуваат и да не фрлаат смет и шут на оваа локација, изјави директорот на претпријатието Сашо Петрушевски.
Акцијата за кастрење на дрвјата веќе се спроведува на градскиот кеј, а од септември се очекува нова акција што ќе опфати кастрење на дрвјата и уредување на јавно-зелените површини.
– Акцијата ќе се спроведува во координација со куќните совети во различни делови од градот согласно потребите и веројатно ќе се спроведе паралелно со есенската акција за чистење која веќе стана традиционална, истакна Петрушевски.