Екипите на ЈП „Чистота и Зеленило“ реализираат уште една акција за расчистување на „дивата“ мини депонија пред влезот на кумановската населба „Перо Чичо“. Досега, само за еден ден изнесени се 10 камиони со смет, информираше директорот на претпријатието, Даниел Стојчевски. За чистењето на депонијата ангажирана е дополнителна механизација.
– Депонијата постојано се чисти, но и постојано се создава. Исчистен е горниот дел, од понеделник продолжуваме со страничниот дел, изјави Стојчевски.
Депонијата пред населбата „Перо Чичо“ беше исчистена пред само два месеци, но повторно по кој знае кој пат, несосвесни граѓани на оваа локација фрлаа смет и градежен шут во огромни количини. Во текот на летото, во неколку наврати гореше и сметот на депонијата, па постојано интервенираа и екипите на противпожарната единица.
Надлежните од претпријатието апелираа до граѓаните совесно да се однесуваат кон непосредната животна средина.
Екипите на ЈП „Чистота и Зеленило“ ја исчистија и улицата „Ѓорче Петров“ која води кон населбата и го уредија зеленилото на паркинг просторот пред населбата.