Полицијата денеска ги запираше возилата на потегот кон националниот парк „Јасен“, но не ги легитимираше возачите, туку им доделуваше флаери. Акцијата е дел од проектот „Лето без пожари“ чија цел е заштита и зачувување на шумските и зелените површни од пожари.
– Граѓаните да не фрлаат отпушоци додека се движат кон излетничките места, да не палат оган и скара на отворено особено во овој период од годината, порачуваат надлежните.
Според нив, несовесноста и невниманието се најчестите причини за појава на пожари. Но, секоја година се намалува ризикот зашто луѓето стануваат се посвесни. Внимаваат при престојот во прирорда, особено при палењето огнови и фрлањето на отпушоците.
Предвидено е во иднина да се формираат повеќе волонтерски противпожарни друштва во месните заедници.
Минатата година големи пожари ги зафатија Катланово и Јасен, а во Струмица огнот однесе и човечки животи.
Проектот „Лето без пожари“ почна кај клучката кон селото Света Петка во општина Сопиште, а го реализира СВР Скопје.