Под мотото „Заедно подобри, заедно посилни, заедно во Европа“ вечерва во Битола Демократската унија за интеграција (ДУИ) одржа предизборен митинг на кој ги претстави кандидатите за пратеници за претстојните вонредни парламентарни избори во Република Македонија.
Во своето обраќање до членовите и симпатизерите на ДУИ, лидерот на таа партија Али Ахмети порача дека очекува поддршка од сите граѓани на Македонија затоа што како што рече не е целта само да се соберат гласовите, туку и да се направи нешто за граѓаните.
– Бараме поддршка од албанците, но и од другите граѓани на Македонија за реализирање на Охридскиот рамковен договор кој нуди мир и спокојство во државата, но тој воедно е и супстанца за влез во Европа. Охридскиот рамковен договор нуди мир, стабилност, меѓуверска толеранција. Сите ние сме луѓе, сите ги имаме истите проблеми и затоа треба да се обединиме бидејќи нашата иднина е во НАТО и ЕУ, а во соработка со сите соседни земји може да се гарантира здрава перспектива за државата. Мирот, редот и безбедноста се иднината на граѓаните, истакна лидерот на ДУИ Али Ахмети.
На вечерашниот предизборен митинг во Битола ДУИ го претстави носителот на листата кандидати за пратеници од изборната единица број 4 Неџати Јакупи и кандидатката за пратеничка Хуља Рочи која потекнува од Битола, како и носителот на листата кандидати за пратеници од ИЕ 5 Муса Џафери и кандидатката за пратеничка Афродита Баталоска.