Министерот за труд и социјална политика Спиро Ристовски очекува по изгласувањето на новиот закон за вработување и осигурување во случај на невработеност јасно да се дефинираат и класифицираат евиденциите на лица кои активно бараат работа и лица кои се пријавуваат заради остварување на определени права, популарно наречени пасивни невработени лица кои не сакаат работно да бидат ангажирани.
„Во изминатиот период 80-тина илјади граѓани беа тргнати од списокот на невработени, а само седум проценти од нив поднесоа жалба на таквото решение на Агенцијата. Со тоа се потврдува дека тие се свесни оти не биле во право, односно евидентно е дека сме констатирале пропусти во нивното функционирање“, изјави Ристовски .
Државниот инспекторат за труд во соработка со Агенцијата за вработување, рече, врши инспекциски надзори и практично дел од лицата кои се избришани од евиденциите се тргнати врз таа основа.
„Кога при инспекциите ќе се констатира дека некое лице е ангажирано на црно, Агенцијата го трга од списокот на невработени. Ова системско решение ќе продолжиме да го реализираме и во иднина, а очекуваме со новиот закон јасно да се дефинираат и класифицираат невработените лица на активни баратели и лица кои не бараат работа“, рече Ристовски.
Директорот на Агенцијата за вработување Влатко Поповски истакна дека при секое посредување голем дел од невработените кои се поканети на медијација, односно посредно интервју за вработување одбиваат работа или не се појавуваат на интервјуто.