73-годишна жена се запалила горејќи стари алишта на тераса. Според полицијата, настанот се случил вчера во 11.50 часот кога во СВР Скопје било пријавено дека на улицата Радишанска избувнал пожар на терасата од куќата во сопственост на П.С. (73) од Скопје.
Пожарот, според пријавеното, избувнал кога П.С. запалила стари алишта, при што била зафатена балконската врата. Притоа таа добила тешки телесни повреди и со возило на Итната медицинска помош била пренесена на Ургентниот центар при комплексот клиники „Мајка Тереза“, каде што ѝ била укажана лекарска помош. Пожарот бил изгаснат од екипа на Бригадата за противпожарна заштита, а увид на местото извршила екипа од СВР Скопје.