Три милиони денари планира да потроши ЈП Чистота и зеленило-Куманово за набавка на ракија, вино, пиво, жестоки пијалоци, газирани и негазирани сокови, минерална вода и кафе.
Денеска до Бирото за јавни набавки доставиле оглас проценет на 50.000 евра без ДДВ за набавка на безалкохолни и алкохолни пијалоци во време траење од една година.
Во огласот до Бирото за јавни набавки стои:
„Место на испорака на стоките или извршување на услугите, или локација на извршување на работите-Угостителски објекти на локации – Кеј на бул. Октомвриска Револуција – с. Пелинце“
Во Февруари година директорот на Чистота и зеленило-Куманово заедно со уште четири лица беше уапсен под сомнение дека извршиле кривично дело „злосторничко здружување“ и „злоупотреба на службена положба и овластување“.
Како што објави тогаш МВР, тогашниот директор на Чистота и зеленило ја злоупотребил својата службена положба и овластување со пречекорување на границите на своето службено овластување и иницирал набавка на три половни комунални товарни моторни возила за подигање, собирање и транспортрање на смет и едно половно специјално моторно возило – метлачка за потребите на претпријатието преку Постапка за доделување на договор за јавна набавка-Тендер. И за таа цел заедно со второ осомничениот кој исто така ја злоупотребил својата службена положба и овластување со пречекорување на границите на своето службено овластување по претходен договор дека ќе го добие тендерот, организирале посета на авто-плацеви на територија на Германија, со цел пронаоѓање на соодветни возила, нивно плаќање преку сметка на фирмата, од кои средства дел се авансно платени од ЈП „Чистота и зеленило“ Куманово заедно со нивно транспортирање до Македонија.
Возилата биле набавени за сума од 61,764 евра а на ЈП Чистота и зеленило биле продадени за 86,179 евра а разликата од 34,219 евра ја поделиле екс директорот и второ осомничениот соопшти полицијата.