Кривична пријава и 30 дена притвор доби 26-годишен скопјанец кој нападнал жена и се обидел да ја силува на Средно Водно.
Истиот напаѓач се обидел да силува и 28-годишна девојка пред влез на зграда на улицата Востаничка во Скопје.
Тој ги признал делата, по што со кривична пријава е предаден на ОЈО Скопје и надлежниот суд кој му одредил мерка притвор.
„Полициски службеници од Единицата за насилен криминал – Одделение за крвни и сексуални деликти при СВР Скопје до ОЈО Скопје поднесоа кривична пријава против М.С. (26) поради основано сомнение дека сторил кривични дела обид за силување и полово вознемирување, по што од судија на претходна постапка му е одредена мерка притвор од 30 дена“, велат од МВР
Веднаш по добиени пријави од 49-годишна жена дека машко лице на 26.02.2023 се обидело да изврши обљуба врз неа на Средно Водно, како и од 28-годишна жена дека машко лице на 04.03.2023 се обидело да изврши обљуба врз неа, преземени се мерки и активности за пронаоѓање на сторителот, по што М.С е приведен во полициска станица.
Осомничениот, на 26 февруари, на пешачка патека на Водно ја пресретнал жената, со сила ја повлекол кон него и ја турнал на земјата, па легнал врз неа, со намера да ја принуди на сексуален однос. Жртвата давала активен и континуиран отпор. Во тој момент до местото на настанот се приближило непознато женско лице по што пријавениот станал и веднаш побегнал од местото на настанот.
Истиот осомничен, на 4 март, пред влез на зграда на улицата Востаничка во Скопје, нападнал и се обидел да изврши полов напад врз уште една жена. Жртвата го турнала од себе осомничениот, силно вознемирена и исплашена почнала да вика помош, па избегала кон својот дом, веднаш пријавувајќи го настанот во полиција.