Подобрување на урбанистичките и инфраструктурните услови за сите граѓани во општините во Република Македонија и забрзување на локалниот економски развој имаат за цел активностите и мерките предвидени во програмите на кандидатите за градоначалници од ВМРО-ДПМНЕ.
– Во програмите на кандидатите за градоначалници на претстојните локални избори значаен акцент е даден на изградбата на инфраструктурата, обезбедување поголем и подобар комунален ред, довршување на процесот за легализација на дивоградбите, како и подобро стопанисување со државното градежно земјиште кои со измените на законите е под надлежност и стопанисување на единиците на локалната самоуправа, истакна на денешната прес-конференција министерот за транспорт и врски и член на ИО на ВМРО-ДПМНЕ Миле Јанакиески.
Тие, истакна тој, ќе обезбедат силен поттик за развој на општините, а нивниот развој несомнено ќе биде значајна поткрепа на вкупниот економски напредок и подобар и подостоинствен живот на сите граѓани.
– Изминативе четири години во општините каде што локалната власт беше предводена од ВМРО-ДПМНЕ, бевме сведоци на изградба и реконструкција на повеќе стотици улици и локални патишта, како никојпат досега во Македонија, а ве уверувам дека таквиот тренд ќе продолжи и во иднина. Многу од проектите во овие програми се токму тоа, со точни имиња на улиците и локални патишта низ градовите и населените места, со прецизна сума и прецизни рокови за реализација, истакна Јанакиески.
Со владина поддршка, додаде, ќе продолжат и проектите за реконструкција и изградба на водоводните и канализациски мрежи во населените места ширум Македонија, за што средства обезбеди Владата на Република Македонија, а реализацијата е во нејзина и во надлежност на локалните самоуправи и Владата.
– Исто така во програмите на кандидатите за градоначалници се предвидува и голем број други проекти, како изградба на паркови, детски и спортски игралишта, училишта, забавни паркови, рече Јанакиески и додаде дека во значаен дел од програмите кандидатите се обврзуваат на набавка на нови возила за одржување на комуналниот ред.