Околу 380 вработени во прилепската фабрика за наменско производство и еден од загубарите „Еурокомпозит“ од денеска стапија во генерален штрајк. Бараат исплата на четири плати и заостанатите придонеси и решавање на тешката состојба во фабриката.
– Моментално ситуацијата е многу тешка. Неколкупати апелиравме до владата да се изнајде решение. И се уште го упатуваме апелот, вели Бранко Чатлески, претседател на синдикалната организација.
Како што информира Лазо Ангелески, претседател на регионалниот синдикален совет, гранковиот синдикат за енергетика и рударство е во комуникација со надлежните министерства зашто е уверен дека за наменската фабрика има иднина.
Според директорот на „Еурокомпозит“ Никола Лучески, единствен спас е стратегиски инвеститор.
– Последниот тендер минатата недела не успеа. Се јави само една странска фирма и побара документација но и време за да го преиспита бизнис планот. Веднаш е пристапено кон нова тендерска документација, вели Лучески кој нагласува дека фабриката има заостанати долгови од преку еден и пол милион евра од неисплатени повеќегодишни кредити.