На Волстрит цените на акциите паднаа минатата недела бидејќи инфлацијата во САД неочекувано се зголеми, додека европските берзи зајакнаа, најмногу благодарение на добрите деловни резултати на компаниите.
На Волстрит, Dow Jones изгуби 0,1 отсто минатата недела, на 38.627 поени, додека S&P 500 се лизна за 0,4 отсто, на 5.005 поени, а индексот Nasdaq загуби 1,3 отсто, на 15.775 поени. По пет недели раст, индексите паднаа минатата недела бидејќи американската инфлација неочекувано порасна во првиот месец од оваа година.
Извештајот, објавен во вторникот, покажа дека во јануари потрошувачките цени пораснале за 0,3 отсто на месечно ниво и 3,1 отсто на годишно ниво, што е повеќе од очекувањата на аналитичарите.
Во последниве месеци цените на акциите силно пораснаа бидејќи пазарот процени дека инфлацијата ќе ослаби и дека како резултат на тоа ФЕД ќе почне да ги намалува каматните стапки веќе во март.
Сепак, имајќи предвид дека инфлацијата се уште е далеку над целното ниво на ФЕД од 2 отсто, на пазарот веќе не се ни споменува мартовскиот пад, а по извештајот за потрошувачките цени, надежите за намалување на каматните стапки во мај исчезнаа.
Пазарот на пари сега проценува дека шансите за намалување на стапката на ФЕД во мај се помали од 50 проценти. „Многу функционери на ФЕД на различни начини во последниве недели велат дека очекувањата на пазарот за намалување на каматните стапки во првата половина од годината се предвремени. Извештајот за потрошувачките цени сега го потврди ова“, вели Боб Елиот, директор во Unlimited Funds.
За разлика од Волстрит, цените на акциите на европските берзи пораснаа минатата недела, благодарение на добрите деловни резултати на европските компании, но и на корекција на цените, со оглед на тоа што паднаа во претходните две недели.
Лондонскиот FTSE индекс минатата недела зајакна 1,8 отсто, на 7.711 поени, додека франкфуртски DAX порасна за 1,1 отсто, на 17.117 поени, а париски CAC за 1,6 отсто, на 7.768 поени.