Американските работодавачи минатиот месец отвориле значително поголем број работни места во споредба со ноември, покажуваат најновите податоци.
Во извештајот на приватната компанија за вработување АДП се наведува дека работодавачите во декември отвориле 215.000 работни места, што е значително повеќе во однос на ноемвриските 148.000 работни места.
До зголемување на вработеноста дошло пред постигнувањето договор меѓу Конгресот и американскиот претседател Барак Обама за избегнување на зголемен данок за повеќето Американци.
– Пазарот на труд се покажа стабилен во декември, и покрај интензивирањето на преговорите за фискалната бездна, истакна Марк Занди, главен економист на компанијата „Мудис аналитикс“, која заедно со АДП работи на извештајот за вработување во приватниот сектор.