Стечајците и работниците прогласени за технолошки вишок бараат Владата конечно да има свест и разум и по неколку години голгота да го прифати нивното барање за месечен надомест од 6.000 денари за стечајците и технолошкиот вишок што имаат наполнето 15 години работен стаж и старост од 50 години за жени и 53 години за мажи .
Претседателката на Координативното тело на стечајци, Лиљана Георгиевска се пожали дека и покрај нивната упорност, премиерот неколку години не сака да ги прими.
Бедниот живот и нервозите си го зедоа својот данок, и многумина не дочекаа власта да им ја ублажи бедата.
„Во Куманово, за еден месец умираат по 12 стечајци. Четириесет и седум отсто од луѓето се веќе починати од срцеви или мозочни удари. Луѓето се угнетени, гладни, болни, со висок притисок. Но, ова е само најава и ние сме упорни во нашите барања. Груевски ќе не гледа почесто и на улица за да не мисли дека сите сме умреле. Нека не го разјадуваат гладниот народ“, изјави Георгиевска.
Предлог законот за стечајци петти пат треба да се најде пред пратениците.
Стечајните работници најавија дека доколку нивните барања не бидат прифатени, ќе преземат порадикални мерки, а не ја исклучуваат и можноста својот револт да го искажат преку граѓански немири.