На охридско-струшката ривиера се бара место повеќе. Сместувачките капацитети се исполнети до максимум, информира претседателот на ХОТАМ Крсте Блажески.
Тоа, како што нагласи, е добро. Туристичката сезона го достигнува својот врв, а туристичките работници, работат за целосна исполнетост и добра сезона.
– Хотелите се преполни, се бара кревет плус и кај приватните станоиздавачи. Од она што сум информиран од терен, на охридско-струшкото крајбрежје се е исполнето до последното место, пребукирани сме, изјави Блажески за МИА.
Секоја година туристичкиот максимум е околу 2-ри август, односно крајот на јули и почетокот на август, а причина за тоа, споре него, е богатата културна и забавна понуда.
– Забавите и културните настани во овој период се најбројни, токму тие во најголем број ги привлекуваат гостите. Познати ди-џеи, звучни естрадни имиња, културни манифестации…, секојдневно гостуваат на ривиерата, подвлече првиот човек на ХОТАМ.
Туристичката понуда на охридско-струшкото крајбрежје годинава е збогатена со изградбата и пуштањето во употреба на неколку луксузни хотели, што го подига и нивото на услугите.
Исполнетоста е голема и на Преспанкото крајбрежје и во Дојран, а Блжески ги повика домашните, но и странските туристи да ја посетата Македонија и да ги видат убавините што таа ги поседува.
– Препорака до домашните, но и странските гости: посетете ги убавините на Македонија. Дали тоа ќе биде едно од езерата кое ќе го одберете или ќе се одлучите за друга алтернатива, квалитетот на услугите е на високо ниво и сите хотели и помали сместувачки капацитети се подготвени да ве деочекаат. Посетете некоја македонска дестинација, нагласи Блажески.
Покрај од земјава, и годинава остануваме најпривлечна дестинација за Холанѓаните, но не изостануваат ниту гостите од соседството, Полска, Белгија, Турција…