Меѓународниот монетарен фонд (ММФ) ги повлекува своите експерти од Атина, кои ќе се вратат во земјата најрано кон средината на април, по православниот Велигден, објави електронското издание на германскиот весник „Шпигел“.
Весникот, повикувајќи се на извори во ММФ, наведува дека Фондот се решил на ваквиот потег бидејќи сегашните преговори „не водат до никаков резултат“.
Поради безперспективноста на преговорите претставниците на ММФ ќе можат велигденските празници да ги минат во своите домови. Од друга страна и Грција изразила желба да го одбелжи Велигден без да биде ангажирана со преговори, наведува „Шпигел“.
Според весникот, поради ваквите одлуки преговорите за ново кредитирање на Грција ќе бидат обновени најрано кон средината на април.