Премиерот Никола Груевски, заедно со владина делегација која ја сочинуваат министерот за информатичко општество и администрација Иво Ивановски и заменик министерот за економија Христијан Делев, денеска ќе престојува во политичка и економска посета на Република Литванија.
Како што соопшти владината прес-служба, македонскиот премиер ќе има средба со литванскиот колега Алгирдас Буткевичиус и со претседателот на Парламентот, Видас Гедвилас.
Премиерот Груевски и владината делегација ќе присуствува и ќе ги презентира можностите и поволностите за инвестиции во Македонија на бизнис форумот во Вилнус, кој е организиран во соработка со Стопанската комора на Литванија.
Трговската размена меѓу Македонија и Литванија во изминатите години има тенденција на зголемување. Во 2012 година, вкупната трговска меѓу двете земји изнесувала 4,3 милиони американски долари, од кои извозот 2,5 милиони американски долари, а увозот 1,8 американски долари. Во периодот од јануари – април 2013 година, размената изнесува 840 илјади американски долари, од кои извозот 539 илјади американски долари, а увозот 301 илјади американски долари.
Литванија е поддржувач на ЕУ и НАТО интеграциите на Македонија. На 1 јули 2013 година Литванија прв пат го презеде претседавањето со Советот на Европската унија.