Откупот на тутунот сѐ уште не е интензивиран. Дури осум од десетте компании сѐ уште не го почнале откупот на тутунот. На теренот се само Прилепскиот комбинат и малата компанија „Кавекс“ од Неготино. Ниту од Сојузот на земјоделски здруженија не знаат зошто откупувачите молчат и тактизираат.
Од Министерството за земјоделство потврдуваат дека за утре во Министерството е закажан состанок со компаниите за откупот на тутунот.
-Досега никоја од компаниите не известила кога ќе почнат со откупот, ниту знаеме зошто молчат и тактизираат. Тутунарите почнуваат да се прашуваат што се случува, се создава притисок, неизвесност, вели Кире Ристески, претседател на Сојузот на земјоделските здруженија.
Откупувачите ги користат законските можности со кои имаат рок до 15 декември да ги отвортат пунктовите. Токму ова иницира да се бара во законските измени прецизен датум за почеток на откупната кампања.
-Сакаме со продолжувањето со изработката на Законот за тутун, да го внесеме првиот и последниот ден на почеток и крај на откупот. Односно, откупот на тутунот да почне на 1 декември и да тре до 28 февруари. Досега е дадена можноста компаниите да може да почнат од 15 ноември и со краен рок да ги отворат пунктовите до 15 декември. Вака компаниите тактизираат со почетокот на откупот, објаснува Ристески.
Поради притисокот што се создава, Прилепскиот тутунски комбинат денес ќе откупува само во градскиот пункт и во Радовишко. Од утре и во населените места.
Годинашнава реколта тутун се проценува на 22 000 до 24 000 тони со висок квалитет. Двете компании досега презеле околу 300 тони тутун по просечна цена од 420 денари.