Од денеска по нови повисоки коригирани цени ќе се продаваат 11-те видови на овошје и зеленчук за кои Владата неодамна донесе одлука за замрзнување на цените.
Владата вчера на седница донесе одлука со која килограм домати и краставици ќе чини максимум 95 денари, килограм пипер до 100 денари, килограм грав 95. Кромидот поскапува за десет денари по килограм и ќе биде 70 денари, а само леќата ќе чини над 100, односно ќе се продава по 110 денари за килограм. Килограм банани ќе чини до 75 денари, килограм портокали до 60, килограм мандарини до 65 и килограм лимони до 60 денари.
Причината поради која е предложена ваквата измена на одлуката е поради тоа што увозната цена на одредени видови овошје и зеленчук е зголемена.
– Министерството за економија, како предлагач на Одлуката, соопшти дека врз основа на спроведените консултации со најголемите увозници на овошје и на зеленчук во Република Северна Македонија, како и имајќи ги во предвид најновите податоци од Царинската управа, е утврдено дека увозната цена на одредени видови овошје и зеленчук е зголемена, поради претстојните празници, соопшти вчера владината прес-служба.